Category Archives: Bybelstudies

Wie is Christus

SKRIFLESING:       Filippense 2:5-11
FOKUS:                     Filippense 2:6-7
TEMA:                        Christus se gesindheid teenoor sy menswording.

Laai die Bybelstudie as ‘n Word-dokument af.

Filippense 2:5-11 is uniek in die sin dat dit ons Here Jesus se eie gesindheid teenoor sy menswording beskryf. Hier hoor ons wat Hy bereid was om in ons plek te doen.

Verdieping

  1. Wat beteken dit dat Jesus “in die gestalte van God was” (Fil 2:6)?
  2. Wat beteken dit dat Hy “die gestalte van ’n slaaf” aangeneem het (Fil 2:7)?
  3. Wat sê die volgende woorde van ons Here Jesus se gesindheid teenoor sy menswording: Hy “het sy bestaan op Godgelyke wyse nie beskou as iets waaraan Hy Hom moes vasklem nie” (Fil 2:6b).
  4. Hoekom is die beskrywing van ons Here Jesus se menswording as ’n “vernedering” so akkuraat?
  5. Hoekom het Jesus die menslike natuur aangeneem? Vgl. Heb 2:14,17.
  6. Gee verskeie redes hoekom kruisiging as ’n “vernedering” beskou kan word. Vgl. Deut 21:23; Gal 3:13.
  7. Wat leer ons uit die feit dat Jesus juis “gehoorsaam” was tot in die dood?
  8. Hoekom was Jesus gehoorsaam tot aan die dood? Vgl. 2 Kor 5:21.
  9. Wat is die gevolg van Jesus se menswording en sterwe volgens Filippense 2:9-11?

Toepassing

  1. Met alles in ag geneem, wat sou jy sê is die werklike boodskap van Kersfees?
  2. Lees Filippense 2:5. In die lig van alles wat sover bespreek is, watter “gesindheid” word daar van my en jou verwag? Vgl. Fil 2:3-4. Wees lekker prakties.

Dáár by Betlehem verbind die ewige Homself aan tyd, en die Koning van die eeue neem die gestalte van ’n slaaf aan

Hardloop die wedloop wat God voor jou lê

SKRIFLESING:        Hebreërs 12:1-3
FOKUS:                       Hebreërs 12:2
TEMA:                        Hardloop die wedloop wat God voor jou lê met volharding!

Laai die Bybelstudie as ‘n Word-dokument af.

In Hebreërs word ons aangemoedig om in die geloof te volhard ten spyte van moeilike omstandighede. In ons Skrifgedeelte word geloof vergelyk met ’n wedloop: ons word soms moeg, maar ons moet alles doen om by die wenstreep te kom!

Inleiding

  1. Wat is “volharding”? Hoor by elkeen en kom by ’n definisie uit.
  2. Gaan in die ry af en hoor by elkeen waarin hy of sy volharding het.

Om ons geloofswedloop suksesvol te kan voltooi, is drie dinge nodig:

[1] Vergemaklik jou wedloop deur al jou laste en sonde af te gooi

  1. Hoekom wil ’n atleet sover moontlik sonder enige laste (ekstra gewig) deelneem?
  2. Wees lekker prakties: Maak ’n lys van die dinge wat vir ons laste kan wees in ons geloofswedloop.
  3. In die lig van die wedloop, wat beteken dit dat sonde ons “maklik verstrik”?
  4. Wees lekker prakties: Van watter verskillende sondes wat “algemeen” is vir ons ouderdom beveel die Here ons om ontslae te raak?

Die Here verwag nie van ons om ekstra bagasie te dra in hierdie wedloop nie, maar bloot om te hardloop!

 [2] Hardloop jou wedloop met volharding

  1. Wat beteken dit prakties om die geloofswedloop te “hardloop”?
  2. Waarom is volharding so belangrik vir ’n suksesvolle geloofswedloop?

In die geloof is ons nie besig met ’n naelloop van ’n paar honderd meter nie, maar met ’n langafstand-wedloop. Hardloop daarom met volharding!

[3] Vestig jou oog op Jesus

  1. Die opdrag om te hardloop met “die oog gevestig op Jesus” maak dit duidelik hoe daar gehardloop moet word. Wat beteken dit prakties?
  2. Hoekom kan en moet ons ons Here Jesus duidelik voor oë hou?
  3. Hoekom word ons Here Jesus die Begin en Voleinder van die geloof genoem?
  4. Hoekom word daar hier gepraat van die kruis as ’n skande?
  5. Hoe ondersteun die Heilige Gees ons in die geloofswedloop? 2 Tim 1:7.
  6. Wat sal die gevolg wees van oë wat nie op Jesus gevestig is nie?

Afronding

  1. Watter dinge is volgens 12 nodig om jou geloofswedloop suksesvol te voltooi?

My lewensambisie: om Christus al hoe beter te leer ken

SKRIFLESING:        Filippense 3:1-16
FOKUS:                       Filippense 3:10-12
TEMA:                        My lewensambisie: om Christus al hoe beter te ken!

Laai die Bybelstudie as ‘n Word-dokument af.

Citius. Altius. Fortius. = Vinniger. Hoër. Sterker.

Dit is die amptelike leuse of ambisie van die Olimpiese Spele. In ons Skrifgedeelte praat Paulus onder leiding van die Heilige Gees van sy ambisie as Christen-atleet.

Inleiding

  1. Wat is jou grootste droom of ambisie? Hoor by elkeen in die groep.

Paulus se lewensambisie en ons lewensambisie

  1. Wat sou jy sê was Paulus se lewensambisie vóór sy bekering? Fil 3:4-6.
  2. Wat het gemaak dat Paulus se lewensambisie geheel en al verander is?
  3. Wie van julle het rekeningkunde as vak? Verduidelik vir die groep wat dit beteken as Paulus sê dat dit wat eers vir hom ’n bate was, hy nou as ’n las.

Paulus gebruik ’n baie skerp woord om na sy vorige lewensambisie te verwys. Hy noem dit “verwerplik” (1983/92-Vertaling) – letterlik “drek” (1933/53-Vertaling)!

  1. Wat leer die Here ons hier oor hoe ons gered word? Vgl Ef 2:8-10.
  2. Hoe kan ons Paulus se lewensambisie in Filippense 3:10-11 opsom?
  3. Wees lekker prakties: Wat beteken dit alles “om Christus te ken”?
  4. Hoe het Paulus se lewensambisie ook uiting gevind in sy woorde? Vgl. 1 Kor 2:2.
  5. Dink bietjie saam: Hoekom moet Paulus se lewensambisie ook elke Christen se lewensambisie wees?

Dis goed en reg om ambisie te hê in jou akademie, jou sport, jou verhoudinge, jou ontspanning. Maar hierdie ambisie mag nooit maar nooit ons lewensambisie wees nie.

Ons moet daarna streef om Christus al hoe beter te ken!

  1. Paulus erken dat hy Christus nog nie ken soos hy behoort nie. Hoekom is hierdie woorde skokkend as ons in ag neem wie Paulus was en wat hy alles gedoen het?
  2. Wees lekker prakties: Wat moet ons saam met Paulus doen om te verseker dat ons Christus al hoe beter leer ken?
  3. Hoekom is die beeld van atletiek juis so geskik om ons geestelike groei te beskryf?
  4. Wat sê hierdie strewe van Paulus vir ons wat so baie keer dink dat ons gered is en nou maar net agteroor kan sit en wag vir die wederkoms?
  5. Paulus sluit hierdie gedeelte af met die woorde dat ons almal wat geestelik volwasse is, hierdie gesindheid moet hê. Watter gesindheid is dit?

Afronding

  1. Som hierdie Bybelstudie in ’n enkele sin op.

Hoe om geestelik fiks te word & bly

SKRIFLESING:        1 Timoteus 4:6-16
FOKUS:                     1 Timoteus 4:7-8
TEMA:                        Hoe om geestelik fiks te word en te bly.

Laai af as ‘n Word-dokument.

In 1 Timoteus 4 leer Paulus vir Timoteus hoe hy ’n goeie dienaar van Jesus Christus kan wees. Een so manier is deur geestelik fiks te word en te bly.

Inleiding

  1. Sou julle sê Suid-Afrikaners hou oor die algemeen van sport? Maak ’n lys van die verskillende spoortsoorte waaraan elkeen in julle groep deelneem.
  2. Watter belangrike dinge moet mens doen om te sorg dat jy jou sport kan geniet?
  3. Nou die vraag: In vergelyking met ons fisiese fiksheid, hoe fiks is ons geestelik?

Om geestelik fiks te word en te bly beveel die Here ons by monde van Paulus om twee dinge te doen:

[1] Eet gedurig die regte voedsel (1 Tim 4:6-7a)!

  1. Hoekom is ons geestelike dieet belangrik vir ons geestelike fiksheid?
  2. Wat is die regte geestelike dieet? Wat moet ons “eet” (1 Tim 4:6)? Vgl. Deut 8:3.
  3. Wat word ons gewaarsku om nie te eet nie, en hoekom? Vgl. 2 Tim 2:16; Tit 3:9.
  4. Beoordeel die volgende stelling: “Om fiks te wil word help dit nie jy eet een keer per week gesonde kos en die res van die week net wat jy wil nie. Dieselfde geld vir jou geestelike fiksheid”.
  5. Wees lekker prakties: Hoe kan ons seker maak dat ons elke dag die regte geestelike dieet volg?

[2] Oefen gedurig die regte spiere (1 Tim 4:7b-8)!

  1. Wat is die regte spiere wat Paulus vir Timoteus beveel om te oefen?
  2. Wat beteken dit om jou te oefen om in toewyding aan God te lewe?
  3. Hoekom het ons juis oefening nodig om in toewyding aan God te lewe?
  4. Het liggaamlike oefening volgens ons Skrifgedeelte dan geen waarde nie?
  5. Wat word daarmee bedoel dat om in toewyding aan God te lewe “in alle opsigte groot waarde het, want dit bevat ’n belofte van lewe, vir nou en die toekoms”?
  6. Wees lekker prakties: Hoe kan ons seker maak dat ons elke dag die regte geestelike spiere oefen?

Afronding

  1. Watter dinge is volgens 1 Timoteus 4 nodig om geestelik fiks te word en te bly?

Dit gaan nie daaroor dat ons deur geestelike oefening die ewige lewe kan verkry nie. Onthou: Ons werk nie vir ons verlossing nie, maar vir ons Verlosser!

 

Is dit sonde om die lewe te geniet?

Laai die Bybelstudie af as ‘n Word-dokument.

Lees: Prediker 2:24-25; 3:12-13,22; 5:17-19; 8:15; 9:7-10; 11:9-10
Fokus: Prediker 11:9-10 “Jy wat jonk is, moet vreugde vind in jou jeug en jou jong dae ten volle geniet. Doen wat jy goedvind en waarvan jy hou, maar moenie vergeet dat God van jou rekenskap sal eis oor alles nie. Hou kommer uit jou hart en vermy wat jou liggaam kan kwaad doen. Ook die jeug en die jonkheid kom tot niks.

Bespreking

  1. Wat is die grootste doel van die mens op aarde?
  2. Wat word ons in al sewe Skrifgedeeltes in die boek Prediker beveel?
  3.  Wat is jou eerste indruk as jy hierdie opdrag hoor?
  4. Wie word heeltyd as die gewer van die verskeie gawes in Prediker aangedui? Wat lei ons hieruit af?
  5. Lees weer Prediker 11:9-10. Wat is die enigste en positiewe riglyn wat daar vir jongmense gegee word?
  6. Wat leer Prediker 11:9-10 oor heeltyd uitstel om sekere dinge in die lewe te geniet?
  7. Wat leer Prediker 11:9-10 uiteindelik oor hoe ons ons lewens moet geniet?
  8. Hoe verstaan julle as groep die “beperking” wat ons in Prediker 11:9-10 lees oor “God wat van ons rekenskap sal eis” oor die genieting van die lewe?
  9. Wat beteken dit prakties om kommer uit jou hart te hou en te vermy wat jou liggaam kwaad kan doen?
  10. Wat is die goue reël om te weet wat reg of verkeerd is in wat jy doen of dink of sê volgens Efesiërs 5:10?

Samevatting: Dwarsdeur die Bybel leer ons dat die mens se doel op aarde is om God te verheerlik in alles wat hy doen. In sy boek fokus die Prediker spesifiek op een wyse waarop ons God verheerlik: wanneer ons ons lewens geniet!

Die Here leer ons duidelik vandag deur die Prediker: genieting van die lewe en gehoorsaamheid aan Hom gaan hand aan hand. Ons “alledaagse” en “godsdienstige” lewens hang ten nouste saam. Ons verheerlik God wanneer ons ons lewens in Hom geniet!

Wat weet jy van die skietlood in Amos?

Amos 7:7-9

Die skietlood.

  1. Lees Amos 7:7-9
    • Wat is ʼn skietlood?
    • Wat sê hierdie metafoor vir jou, dat God voor sy volk met ʼn maatinstrument staan?
    • Wat insinueer die simboliek van die skietlood vir jou? Hou in gedagte dit is ʼn instrument wat presisie meet. Loodreg van onder na bo. (Loer ook na Openbaring 3: 15-16)
    • Wat is dan die regte pad? (Kyk ook na Johannes 14: 6)
    • Wat sê die Here sal hy doen aan die wat gemeet word en nie reg is nie?
    • Waarna verwys vers 9 spesifiek?
    • Kan jy aan enige hedendaagse voorbeelde dink?
  2. Bietjie insig.
    • Wanneer gaan ons gemeet word?
    • Wat leer hierdie gedeelte ons dus? En hoe sal jy dit toepas?
    • Enige opmerkings of vrae?

 

Voorbereiding vir die bou van die tempel

1 Kronieke 22:2-19

Voorbereiding vir die bou van die tempel.

Laai hierdie Bybelstudie as ‘n pdf-dokument af.

  1. Lees 1 Kronieke 22:2-19
    • Wat merk jy op uit hierdie gedeelte wat vir jou bekend klink?
    • Watter belangrike vergelyking kan jy uit hierdie gedeelte tref? Gebruik vers 5 as leidraad.
    • Wat was hierdie gebou wat Salomo moet oprig?
    • Hoe beskryf vers 5 hierdie gebou? Hoe moet hy lyk?
    • Dink terug aan ons vorige Bybelstudie uit 1 Korintiërs 3:9-23. Wat was hier die tempel gewees?
    • Watter rol behoort ons “tempel” vandag te speel?
    • Hoekom het Dawid nie self die tempel gebou nie, al het hy alles gehad wat nodig was om dit te doen?
    • Ietsie vir interessantheid! Wie weet wat Salomo se naam beteken?
    • In hierdie hoofstuk word daar deur Dawid aan Salomo baie duidelik verduidelik wat van hom verwag word in die bou van die tempel. Bestaan daar vir ons ook so duidelike riglyn êrens om te sê wat van ons verwag word met die bou van God se koninkryk? Verduidelik.
  2. Leer weer vers 19.
    • Hoe sou jy sê is hierdie hoofstuk op ons lewens van toepassing?
    • Enige opmerkings of vrae?

As die Here die huis nie bou nie

Psalm 127

As die Here die huis nie bou nie.

Laai hierdie Bybelstudie as ‘n Word-dokument af.

  1. Lees Psalm 127 verse 1 en 2.
    • Was is ʼn pelgrim?
    • Wie was Salomo?
    • Wat is die eerste ding wat jy opmerk uit hierdie gedeelte?
    • Hoekom dink jy begin Salomo hierdie “lied”, deur dadelik te sê dat enigiets wat sonder die Here aangepak word, tevergeefs is?
    • Uit vers 1 kom daar twee duidelike woorde te vore, naamlik: bou en beskerm. Wat leer hierdie twee woorde jou oor die karakter van God?
    • Wat kan jy in hierdie twee verse raaksien wat die Here alles vir ons gee?
    • Watter dinge doen jy in jou lewe waar God nie saam met jou bou nie? Hoe kan jy vir God toelaat om dit te bou?
  2. Lees nou Psalm 127 verse 3 – 5.
    • Wat staan vir jou uit in hierdie verse?
    • Hoekom dink jy sê die skrywer in vers 5 dat mens nie hoef te vrees tydens onderhandelinge nie? Lees ook Psalm 128:1.
    • Hoe sal dit wat jy hier geleer het van toepassing op jou lewe wees?
    • Watter dinge is daar in jou lewe wat vrees by jou wek? Hoe weet jy sal die Here jou ook daarin help?
    • Enige opmerkings of vrae?